Новости
среда, 16 август 2017 11:51
Денес во просториите на Секретаријатот за европски прашања се одржа средба помеѓу Заменик Претседателот на Владата задолжен за европски прашања Бујар Османи и Амбасадорот на Кралството Холандија, Валтер Пломп.
Вицепремиерот Османи потенцираше дека Холандија отсекогаш претставувала еден од нашите најискрени поддржувачи во евроинтегративниот процес обезбедувајќи помош на билатерално ниво за јакнење на институционалните капацитети, финансирање на постдипломски студии, поддршка на инфраструктурни проекти како и пренесување на искуствата на холандските експерти, за што сме особено благодарни.
Османи го информираше Амбасадорот за идните планови кои Владата планира да ги преземе во однос на адресирање на клучните приоритети и справување со предизвиците кои произлегуваат од реформската агенда на Владата. Заеднички беше констатирано дека е особено важно да се испорачаат конкретни резултати како потврда за посветеноста на евроинтегративниот процес и враќање на состојбите во нормала.
„Важно е да се фокусираме на она што е реално остварливо и да го направиме процесот што е можно поинклузивен за секој да даде свој придонес во остварувањето на крајната цел да станеме член на европското семејство“ – истакна Османи на средбата. Соговорниците констатираа дека се работи за неповторлива шанса која Македонија не смее да ја пропушти и изразија задоволство од реформската посветеност на новата Влада во исполнување на обврските преземени пред меѓународните партнери.